بمناسبة زكرى حرب اكتوبر المجيده
(انا المصرى).
*************
سألونى ليه بتحبها
رديت ساكنى حبها
ماهو داعى ليها المصطفى
وذكرها ف كتابه ربها
دا اسمها بيحلى المر
حروف تلاته ف اسمها
يا سلام لو انت تحسها
حتلاقى فرحه بتسرى فيك
ودا شئ بسيط من سحرها
دى مصر اللى ترابها تبر
تعالى وشوف معنى الحروف
على قدى انا وفهمى
نقول الميم تلاقى الميم دى من دمى
وتيجى الصاد الاقى الصوره اهى ف رسمى
وتختم ره تهيم روحى ما هى امى
انا العاشق ده لترابها*
وانا الناسك ف محرابها
ولو نادت على فادى
انا المصلوب على بابها
اميره وفيا صاحبة امر
انا المصريه فى دمى انا .... الشاعر
بكل ما فيها وحاسسها ودى مشاعر
بتملان بوجدانى ومالكه قلبى وكيانى
وساعة مالقى ريحه شر انا.... الواعر
يقدم روحه من غير فكر
انا المصرى تعالى وشوف انا ابقى مين
انا احمس على الهكسوس
وانا اللى موحد القطرين
انا المصرى ودا فخرى
وعزى لدفعتى لنصرى
وانا الصانع تاريخ امه
وانا صاحب كمان حطين
وانا المصرى اللى دمه حر
انا البطل اللى طول عمره جسور ما يخاف
وروح و اسأل بنى صهيون ف الاستنزاف
وانا الصانع لمجد عشره من رمضان
بتوفيق ليا من ربى مانا العابد وانا الطواف
وانا اللى عشان كل العرب بدوق المر
انا اللى علم الدنيا انا ..... الاصلى
واسأل عنى كل الغرب ح يشهدلى
وانا العربى اللى كان قبل العرب ما تكون
واصل العلم انا اصله .....ودا اصلى
وانا المصرى اللى عاشق كل حته ف مصر
(انا المصرى. )
عاشق مصر /محمد الشاذلى
ليست هناك تعليقات:
إرسال تعليق